Түркістан облысында көкпардан кейін жас жігітті 25-30 адам өлімші етіп ұрып кеткен

Түркістан облысының Сайрам ауданында 20 жастағы жігітті 25-30 адамнан тұратын топ аяусыз соққыға жыққан. Бұл туралы «Криминальный Казахстан» Telegram каналы мәлім етті, деп хабарлайды Azattyq Rýhy.

Туыстарының айтуынша, оны ес-түссіз жатқан кезде де басынан тепкілеген. Кейін жас жігітті адам жоқ жерге апарып тастап кеткен. Жақындары оны екі сағаттан кейін ғана тауып алған.

Жақындарының сөзінше, жанжал күндіз көкпар ойыны кезінде басталған. Кешке оны мектеп маңына «сөйлесуге» шақырғанмен, ол жерде алдын ала жиналған топ күтіп тұрған. Жәбірленуші бір аптадай жансақтау бөлімінде жатыпты, қазір палатаға ауыстырылғанымен, әлі толық сөйлеп, түсініктеме бере алмайды. Оның екі досы да жарақат алған.

Ата-анасының мәлімдеуінше, шабуыл жасағандардың қолында пышақ, тапанша және кастет болуы мүмкін. Олар ұлдарының қауіпсіздігіне алаңдап, төбелеске қатысқандардың ешқайсысы қамауда еместігіне наразылық білдірген.

Полиция департаменті Түркістан облысы аталған дерек бойынша топтық төбелес фактісімен екі күдікті ұсталғанын, кейін олар үйқамаққа жіберілгенін хабарлады. Тергеу жалғасып жатыр.