30 жылдан кейінгі триумф: Михаил Шайдоров Қысқы Олимпиада чемпионы

Қазақстан қысқы Олимпиада ойындарында 30 жылдан кейін алтын медальға қол жеткізді, деп хабарлайды Azattyq Rýhy.

Италияда өтіп жатқан XXV қысқы Олимпиада ойындарында Михаил Шайдоров мұз үстінде тарихи жеңіс жасап, ел қоржынына мәнерлеп сырғанаудан тұңғыш алтынды салды. Милан мұз айдынында Қазақстан туы көкке көтеріліп, әнұран шырқалды.

Жарыстың шешуші сәтінде Шайдоров мұз айдынын нағыз өнер сахнасына айналдырды. Италиялық Confessa әні мен «Бесінші элемент» фильміндегі Димаш Құдайбергеннің вокалымен өрілген композиция аясында ол еркін бағдарламасын асқан сеніммен, ерекше шабытпен орындады. Әрбір қимыл нақтылығымен, әр секіру биіктігімен көз сүйсіндірді. Спортшы толқуды толық еңсеріп,  5 төрттік секіру элементін сәтті орындады. Бұл мәнерлеп сырғанау тарихындағы ең күрделі әрі ұпайлық құны жоғары элементтердің бірі.

Ерлер арасындағы тартысты додада күрделі каскад орындаған Шайдоров еркін бағдарламада 198.64 ұпай жинады. Қысқа және еркін бағдарламалардың қорытындысы бойынша оның жиынтық көрсеткіші 291.58 ұпайға жетіп, Олимпиада алтынын айқын басымдықпен еншіледі.

Күміс медальді жапониялық Юма Кагияма 280.06 ұпаймен еншілесе, қола жүлде 274.90 ұпай жинаған Шун Сатоға бұйырды. Жалпы турнирге 24 спортшы қатысты.

Осылайша Қазақстан мәнерлеп сырғанаудан тұңғыш рет қысқы Олимпиада чемпионын шығарды. Бұған дейін 2014 жылы Сочи Олимпиадасында Денис Тен қола жүлде алған болатын.

Еске салсақ, Қазақстанның қысқы Олимпиададағы соңғы алтын жүлдесі 1994 жылы Лиллехаммерде тіркелген болатын. Ол кезде шаңғышы Владимир Смирнов чемпион атанса, енді бұл даңқты жетістікті Михаил Шайдоров жалғастырды.

Қазақстан Туризм және спорт министрі Ербол Мырзабосынов Михаил Шайдоровты тарихи жетістігімен құттықтады.

"Михаил Шайдоровты Олимпиаданың чемпионы атануымен шын жүректен құттықтаймын. Бұл — талай жылғы тынымсыз еңбек пен табандылықтың, алға қойған мақсатқа деген сенімнің жемісі. Бүгін Михаил елге зор қуаныш сыйлап, отандық мәнерлеп сырғанаушылардың әлемдік деңгейде бәсекеге қабілетті екенін дәлелдеді. Бұл жетістік жас спортшыларға шабыт беріп, елімізде қысқы спорт түрлерінің дамуына жаңа серпін береді", - дейді Ербол Мырзабосынов..