Украина энергетика саласында төтенше жағдай жариялады

Украина президенті Владимир Зеленский үкімет өкілдерімен, «Халық қызметшісі» фракциясымен және ДТЭК энергетикалық компаниясының басшылығымен өткен кеңестен кейін Telegram-арнасында мәлімдеді, деп хабарлайды Azattyq Rýhy.

Оның айтуынша, Киевте жағдайды үйлестіру үшін тәулік бойы жұмыс істейтін штаб құрылады.

«Киевтегі жағдайға ерекше назар аударылды. Ресейдің соққыларының салдары мен ауа райының күрт нашарлауына байланысты ахуал ауыр. Киев қаласында тұрақты түрде жұмыс істейтін үйлестіру штабы құрылады. Жалпы алғанда, Украина энергетикасында төтенше жағдай режимі енгізіледі. Мұндай жағдайда халық пен қауымдастықтарды қолдау және практикалық мәселелерді шешу жөніндегі жұмыстардың жетекшісі ретінде Украина премьер-министрінің бірінші орынбасары энергетика министрі белгіленді», – деп жазды Зеленский.

Сондай-ақ ол Украина электр энергиясын импорттау көлемін айтарлықтай арттыруды жоспарлап отырғанын айтты.

Бұдан бөлек, президент үкіметке қатты суық кезеңінде коменданттық сағат ережелерін қайта қарауды және халыққа арналған қолдау пункттерінің санын көбейтуді тапсырды.