БҚО-да халық ішетін су қауіпті ме? Тексеріс таңбасыз тағам мен сапасыз суды әшкереледі

Батыс Қазақстан облысында ауыз су мен тамақ өнімдерінің сапасына қатысты алаңдатарлық деректер анықталды, деп хабарлайды Azattyq Rýhy

Өңірлік санитариялық-эпидемиологиялық бақылау департаментінің басшысы Динара Жаңабергенованың айтуынша, 2025 жылы орталықтандырылған су көздерінен алынған 4 163 сынаманың 210-ы (5%) санитарлық-химиялық талапқа сай келмеген.

«Сәйкессіздіктер Ақжайық, Жаңақала, Жәнібек, Бәйтерек, Сырым, Тасқала, Теректі және Шыңғырлау аудандарында тіркелді», – деді ол.

Ал микробиологиялық көрсеткіштер бойынша жағдай одан да күрделі. 4 273 сынаманың 179-ы (4,2%) талапқа сай болмай шыққан. Бұл деректер жоғарыда аталған аудандармен қатар Бөрлі ауданында және Орал қаласында анықталды.

Орталықтандырылмаған су көздері де назардан тыс қалмаған. Бұл бағытта алынған 209 сынаманың 25-і санитарлық-химиялық талапқа сай келмесе, микробиологиялық тексеруден өткен 194 сынаманың 24-інен қауіпті көрсеткіштер анықталған. Сәйкессіздік бес ауданда тіркеліпті.

«Барлық сәйкессіздік жағдайлары бойынша шаруашылық жүргізуші субъектілерге сумен жабдықтау нысандарын тазалау, жуу және дезинфекциялау қажеттігі туралы ресми хаттар жолданды», – деді Жаңабергенова. 

Су ғана емес, дүкен сөрелеріндегі өнімдер де күдік тудырып отыр. Былтыр департамент мамандары 988 түрлі тауарды сатып алып, зертханалық тексеруден өткізген. Оның 618-і – азық-түлік, 370-і – азық-түлікке жатпайтын өнімдер. Нәтижесінде 331 сынамадан талапқа сай келмейтін көрсеткіштер анықталған. Соның ішінде 73-і – тікелей халық тұтынатын тамақ өнімдері.

«Бұзушылықтардың негізгі бөлігі өнімді таңбалау талаптарының сақталмауымен байланысты. Кейбір тауарларда өндіруші туралы мәлімет жоқ, жарамдылық мерзімі көрсетілмеген, өндірілген күні жазылмаған. Бұдан бөлек, ЕАЭО-ның бірыңғай таңбалау белгісі болмаған және мемлекеттік тілдегі ақпараттың жоқтығы да жиі кездеседі», – деді департамент басшысы. 

Оның айтуынша, талапқа сай келмеген өнімдер сатылымнан алынып, кері қайтарылған. Бұл шаралар техникалық регламенттер мен Еуразиялық экономикалық одақтың санитариялық талаптарына сәйкес жүргізілген.