Жылқы іздеп шығып, із-түзсіз кеткен ер адам тірі табылды
Қыстау қызметкері «Шолақ» карьері маңында болған
Ұлытау облысында мал іздеуге шығып, хабарсыз кеткен ер адам тірі табылды, деп хабарлайды Azattyq Rýhy.
Оқиға Қарсақбай ауылдық округіне қарасты Қамыс-Өткел қыстағы аумағында болған. Азаматты іздеуге құтқарушылар мен жергілікті күштер жұмылдырылды.
Төтенше жағдайлар министрлігінің мәліметінше, 1988 жылы туған қыстау қызметкері 5 қаңтар күні таңғы сағат 9:00 шамасында жылқысын іздеп үйінен шыққан. Алайда сол кеткеннен қайта оралмай, жақындары алаңдап, тиісті органдарға хабар берген.
Іздестіру жұмыстарына Ұлытау облысы Төтенше жағдайлар департаментінің күштері тартылды. Нәтижесінде ер адам Қамыс-Өткел қыстағынан шамамен 15 шақырым қашықтықта орналасқан «Шолақ» карьері аумағынан табылды.
«Ер адамның жағдайы жақсы, медициналық көмекке мұқтаж болған жоқ», – делінген ТЖМ хабарламасында.
Қазіргі таңда ол үйіне жеткізіліп, туыстарымен қауышты.
