8 қаңтарда ауа райы қандай болады
Кей өңірлерде қыстың қаһары қатты сезіледі
Қазақстан аумағында алдағы тәулікте ауа райы құбылмалы болады. «Қазгидромет» синоптиктерінің болжамынша, еліміздің басым бөлігінде антициклонның әсерінен жауын-шашынсыз ауа райы орнағанымен, кей өңірлерде қыстың қаһары қатты сезілмек, деп хабарлайды Azattyq Rýhy.
Көп өңірде күн ашық болады
2026 жылдың 8 қаңтарында, бейсенбі күні республиканың үлкен бөлігінде тымық ауа райы күтілуде. Антициклонның ықпалымен аспан ашық болып, айтарлықтай жауын-шашын болмайды деп болжануда. Алайда, бұл суықтың беті қайтты дегенді білдірмейді.
Солтүстік-батыс пен шығыста боран соғады
Атмосфералық фронталды бөліктердің өтуіне байланысты кейбір аймақтарда ауа райы күрт өзгереді. Еліміздің солтүстік-батыс және шығыс өңірлерінде қар жауып, жаяу боран соғады деп күтілуде.
Батыс, солтүстік-батыс және оңтүстік-шығыс аймақтарда жолдарда көктайғақ болуы ықтимал.
Республиканың басым бөлігінде, әсіресе түнде және таңертең қалың тұман түсуі мүмкін.
Жүргізушілерге ескерту
Желдің күшеюі мен көріну деңгейінің төмендеуіне байланысты жолға шығатын жүргізушілерге сақ болу ұсынылады. Әсіресе көктайғақ болжанып отырған өңірлерде арақашықтықты сақтап, жылдамдықты асырмау маңызды.
