СҚО-да бір аурухана заңсыз шығарылған активтер есебінен жөнделеді

Солтүстік Қазақстан облысында қайтарылған активтерден бөлінген 1,3 млрд теңгеге аудандық ауруханаға күрделі жөндеу жүргізіледі. Қаражат Тайынша көпсалалы ауданаралық ауруханасының материалдық-техникалық базасын жаңғыртуға бағытталмақ, деп хабарлайды Azattyq Rýhy. 

Қаражат қайдан бөлінді?

Премьер-министрдің баспасөз қызметінің мәліметінше, жоба президенттің әлеуметтік инфрақұрылымды дамыту жөніндегі тапсырмасы аясында жүзеге асып жатыр. Жөндеу жұмыстары елге қайтарылған заңсыз шығарылған активтер есебінен құрылған Арнаулы мемлекеттік қордан қаржыландырылуда.

Аурухананы жаңғыртуға 1,3 млрд теңге бөлінген.

Ауруханада қандай өзгерістер болады?

Қазір медициналық мекемеде инженерлік желілер мен техникалық базаны жаңарту жұмыстары жүріп жатыр. Жоба аясында заманауи жабдықтар орнатылады, МРТ аппаратына арналған арнайы бөлме және қазіргі талапқа сай клиникалық-диагностикалық зертхана ашылады. Бұл зерттеулерді тікелей аудан орталығында жүргізуге мүмкіндік береді.

Қабылдау бөлімі халықаралық стандартқа көшеді

Қабылдау бөлімі халықаралық триаж жүйесі бойынша жабдықталады. Сондай-ақ, жобаға сәйкес реанимациялық төсектер орналастырылып, медицина қызметкерлерінің науқастарға кедергісіз қол жеткізуі қамтамасыз етіледі.

Бұл шұғыл медициналық көмектің жылдамдығы мен сапасын арттыруға бағытталған.

Медициналық қызмет сапасы артады

Жобаны толық іске асыру нәтижесінде Тайынша ауданаралық ауруханасы жедел және жоспарлы медициналық көмек көрсетудің заманауи стандарттарына сай болады. Бұл өңір тұрғындары үшін медициналық қызметтің қолжетімділігі мен сапасын едәуір жақсартпақ.

Ел бойынша бөлінген қаражат көлемі

Қаржы министрлігінің дерегінше, Арнаулы мемлекеттік қордан 482 млрд теңге бөлініп, ел көлемінде 400-ден астам әлеуметтік және коммуналдық нысан жүзеге асырылып жатыр. Оның ішінде:

• 183 медициналық мекеме,
• ауылдық денсаулық сақтауды дамытуға бағытталған «Ауылдық денсаулық сақтауды жаңғырту» бағдарламасы,
• алғашқы медициналық-санитарлық көмек нысандары,
• көпсалалы ауруханалар,
• жедел медициналық көмек инфрақұрылымы бар.

Мамандардың айтуынша, бұл жобалар аймақтардағы медицина сапасын теңестіруге және ауыл тұрғындары үшін қолжетімділікті арттыруға мүмкіндік береді.