Абай облысында боранды түні мал іздеуге кеткен екі ер адам адасып кетті

Абай облысында боранды түні мал іздеуге кеткен екі ер адам жолынан адасып кетті, деп хабарлайды Azattyq Rýhy.

Түнде Аягөз ауданында ТЖД-нің жедел-құтқару жасағы, полиция қызметкерлері және туысының қатысуымен 1985 және 1964 жылы туған ер адамдарды іздеу жұмысы жүргізілді. Олар мал іздеу үшін автокөлікпен шығып, хабарсыз кеткен.

Іздеу тобы жоғалған азаматтарды Аягөз қаласынан 70 шақырым қашықтықта тапты. Олар медициналық көмекке мұқтаж болған жоқ.

«Белгілі болғандай, дала жолымен келе жатқан кезде олардың көлігі қарға батып қалған. Олар көлікті тастап, жаяу жүріп, ең жақын қараусыз қалған шаруа қожалығының үйіне жеткен. Ұялы байланыс болмағандықтан олармен байланыс орнату мүмкін болмады», – делінген ТЖМ хабарламасында.