Екі қалада ауа сапасы нашарлайды: синоптиктер ескерту жасады

Алматы және Атырау қалаларының тұрғындары бүгін ауаның ластануына дайын болуы керек. «Қазгидромет» синоптиктері екі қалада қолайсыз метеорологиялық жағдайлар орнайтынын ресми түрде мәлімдеді, деп хабарлайды Azattyq Rýhy. 

Қолайсыз метеожағдай деген не?

2025 жылдың 20 желтоқсанында Алматыда, ал түнде Атырауда атмосферада зиянды заттардың жиналуына ықпал ететін факторлар қалыптасады.

Қолайсыз метеорологиялық жағдайлар – бұл желсіздік (штиль), әлсіз жел, тұман және инверсия сияқты факторлардың жиынтығы. Мұндай кезде автокөлік түтіні мен өндірістік қалдықтар сияқты зиянды заттар ауаның жер беті қабатында жиналып, таралмай қалады.

Алматыда бұл жағдай күні бойы, ал Атырауда негізінен түнгі уақытта байқалады.

Тұрғындарға кеңес

Ауаның ластануы күшейген кезде қала тұрғындарына, әсіресе денсаулығында кінәраты бар азаматтарға бірнеше сақтық шарасын сақтау ұсынылады:

1. Далада аз болыңыз: Сыртта серуендеу уақытын барынша шектеңіз. Әсіресе, автотрассаларға немесе басқа да ластану көздеріне жақын жүруден аулақ болыңыз.

2. Науқас адамдарға ескерту: Өкпенің созылмалы ауруларымен, жүрек-қан тамырлары немесе аллергиямен ауыратын жандар сыртқа шыққанда қажетті дәрі-дәрмектерін міндетті түрде жанында ұстауға тиіс.

Мамандар ауа райы оңалғанша спорттық жаттығуларды үй ішінде өткізуді және бөлмелерді желдетуде абай болуды кеңес береді.