Павлодарда түрмеде жазасын өтеп жүргендерге таныстары есірткі мен бірнеше телефон бермек болған

Павлодарда Ұлттық ұланның 6679 әскери бөлімінің әскери қызметшілері ҚАЖК қызметкерлерімен бірлесіп түзеу мекемелерінің аумағына тыйым салынған заттарды алып өтудің бірнеше жағдайына тосқауыл қойды, деп хабарлайды Azattyq Rýhy.

Ұлттық ұланның мәліметінше, 9 желтоқсан күні сағат 12:15 шамасында 6679 әскери бөлімі күзететін мекемеде сәлемдемені тексеру кезінде бақылау және қадағалау взводының бақылаушысы құрма қаптамасынан белгілі бір иісі бар белгісіз заттың он түтігін тапты.

«Тергеу-жедел тобының алдын ала деректері бойынша, тюбиктердің ішінде гашиш майы болған. Тыйым салынған заттар тергеу-жедел тобының қызметкерлерімен тәркіленіп, сараптамаға жіберілді.

Осы күні басқа бір мекемеде келген тамақты тексеру кезінде бес мобильді телефон, бес құлаққап және төрт SIM-карта табылып, тәркіленді. Бұл заттар тамақ салынған контейнердің ішіне мұқият жасырылған», – делінген хабарламада.

Тыйым салынған өнімді тасымалдаудың екі әрекеті де ұландықтар мен ҚАЖК қызметкерлерінің үйлесімді әрекеттерінің арқасында жойылды. Анықталған фактілер бойынша барлық материал әрі қарай талқылау үшін құзыретті органдарға берілді.