Джефф Безостың байлығы 171,6 млрд долларға жетті

Әлемдегі ең дәулетті адам – Amazon компаниясының басшысы Джефф Безостың байлығы рекордтық деңгейде артып, 171,6 млрд долларға жетті деп хабарлады РИА Новости.

Бұған дейінгі де рекордтық көрсеткіш осы Безосқа тиесілі. 2018 жылдың 4 қыркүйегінде оның жиған дәулеті бірден 167,7 миллиард долларға жеткен болатын.

Безостың байлығының күрт өсуіне Amazon акцияларының қымбаттауы себеп болды. Олардың құны сәрсенбі күні 4,4 пайызға артып, әр данасы 2878,7 доллардан сатылған.

Биыл алғашқы жартыжылдықта Джефф Безостың байлығы 56,7 млрд долларға артқан. Бұл қазіргі АҚШ-та байлар мен кедейлер арасындағы алшақтықтың тым ұзап кеткенін көрсетеді деп жазды басылым.

Биыл мамыр айында Comparisun консалтингтік компаниясы өз болжамын жариялаған болатын. Компания сарапшыларының пікірінше, 2026 жылға қарай Джефф Безостың байлығы 1 триллион доллардан асады.