Тұмау өршіп тұр: Астана мектептерінде таңғы фильтр енгізілді

Астанада тұмау және жедел респираторлық вирустық инфекциялар жұқтыру жағдайының өсуіне байланысты мектептер мен балабақшаларда таңғы фильтр енгізілді. Бұл күнделікті тексеру оқу басталар алдында балалардың жағдайын бақылау үшін жүргізіледі, деп хабарлайды Azattyq Rýhy.

Эпидемиологиялық жағдай

Бұл шаралар бас санитарлық дәрігер Айгүл Шағалтаеваның қаулысымен бекітілген. Санитарлық қызметтің деректері бойынша, ауырғандардың 25%-ы мектеп оқушыларына тиесілі, бұл 3430 жағдайды құрайды.

Басты қауіп: Тексерілген сынамалардың басым бөлігінде А(Н3N2) тұмау вирусы, яғни гонконгтық штамм анықталған. 14 жасқа дейінгі балалар арасында бұл вирус 23% жағдайда кездеседі.

Жаңа ережелер

Қаулы Білім басқармасын (мектептер мен балабақшалар) бірқатар  шараны орындауға міндеттейді:

• Таңғы фильтр: Сабақ басталмас бұрын, әр ауысым алдында оқушыларды, балабақшаға баратын балаларды және педагогтарды ЖРВИ белгілері бойынша тексеру үшін жүргізіледі.
• Оқудан шеттету: фильтр кезінде ЖРВИ белгілері анықталған балалар (қызметкерлер) сабақтан (жұмыстан) шеттетіліп, үйлеріне жіберіледі.
• Қашықтан оқытуға көшу: Егер сыныптағы оқушылардың жалпы санынан 30% және одан көп ЖРВИ тіркелсе, эпидемиологиялық жағдай тұрақталғанға дейін олар қашықтан оқыту форматына көшіріледі.
• Сыныпты оқшаулау: Егер бір сыныпта ауырғандар саны 20%-дан 30%-ға дейін жетсе, кабинеттік оқыту жүйесі тоқтатылады және он күнтізбелік күн ішінде сыныпқа жаңа балаларды қабылдауға тыйым салынады.

Қауіпсіздік шаралары

Сонымен қатар қаулыда келесі қосымша талаптар көрсетілген:

Температуралық режим: Оқу бөлмелерінде температура +18-ден +22°С-қа дейін сақталуы керек.

Желдету және ылғалды тазалау: Ылғалды тазалау режимі күшейтіліп, үзіліс уақыты 10-нан 15 минутқа дейін ұзартылады.

Көпшілік іс-шараларды шектеу: Мектептерде мәдени, мерекелік және спорттық көпшілік іс-шараларды өткізуге шектеу қойылады.

Санитарлық посттар: Әр қабатта немесе сыныпта ЖРВИ белгілері бар балаларды дер кезінде анықтау үшін санитарлық посттар ұйымдастырылады.