Сыртқы істер министрлігі Каспий құбырына шабуыл жасалуына байланысты наразылық білдірді
Бұл оқиға Қазақстан мен Украинаның қарым-қатынасына залал келтіреді, деп мәлімдеді СІМ
Қазақстан Сыртқы істер министрлігінің ресми өкілі Айбек Смадияров Каспий құбыр консорциумына жасалған шабуылға байланысты мәлімдеме жасады, деп хабарлайды Azattyq Rýhy.
Сыртқы істер министрлігі Новороссийск теңіз порты акваториясында халықаралық Каспий құбыр консорциумының аса маңызды инфрақұрылымына бағытталған кезекті мақсатты шабуылға байланысты наразылық білдірді.
«Бұл оқиға халықаралық құқық нормаларымен қорғалатын азаматтық нысанға қарсы жасалған үшінші агрессиялық акті болып отыр. Жаһандық энергетикалық нарықтың жауапты қатысушысы ретінде Қазақстан энергия ресурстарын тұрақты әрі үздіксіз жеткізуді қамтамасыз етуге ерекше мән береді», - деді Смадияров.
Ол Каспий құбыр консорциумы әлемдік энергетикалық жүйенің тұрақтылығын сақтауда айрықша орын алатынын атап өтті.
«Осы оқиғаны Қазақстан Республикасы мен Украинаның екіжақты қатынастарына залал келтіретін әрекет ретінде бағалаймыз және украин тарапы мұндай жағдайлардың қайталануына жол бермеу бойынша нақты шаралар қабылдайтынын күтеміз», - деп түйіндеді ресми өкіл.
Еске сала кетейік, бұған дейін Энергетика министрлігі Новороссийск портындағы Каспий құбыр консорциумы теңіз терминалындағы төтенше жағдайға байланысты ресми түсініктеме берген болатын.
