Шымкент қаласының тұрғыны баласынан көз жазып қалғаны үшін істі болды
Бұл оқиға бір жылда екінші рет қайталанып отыр
Шымкентте кәмелетке толмаған баласын қараусыз қалдырған адам әкімшілік жауапкершілікке тартылды, деп хабарлайды Azattyq Rýhy.
Шымкент қаласының Кәмелетке толмағандар істері жөніндегі мамандандырылған ауданаралық сотында кәмелетке толмағанның заңды өкілі К.-ға қатысты ҚР ӘҚБтК-нің 442-бабының 3-бөлігі бойынша әкімшілік іс қаралды. Бұл бап кәмелетке толмағандардың түнгі уақытта көңіл көтеру орындарында немесе тұрғын үйден тыс жерде заңды өкілінсіз жүруіне жол беру фактілеріне қатысты.
Баланың түнгі уақытта жалғыз жүргені анықталған
Сот материалдарына сәйкес, 2025 жылғы 26 тамызда шамамен 00:30-да 2009 жылы туған кәмелетке толмаған М. Шымкент қаласындағы «Арбат» аллеясында заңды өкілінің қарауынсыз жүрген.
Бұл құқық бұзушылық бір жыл ішінде екінші рет қайталанып отыр.
Сот қандай шешім қабылдады?
Істің мән-жайы материалдардағы дәлелдермен – құқық бұзушының түсініктемесімен, әкімшілік құқық бұзушылық туралы хаттамамен және өзге де құжаттармен толық расталды.
Жазаны тағайындау кезінде сот:
- кінәні мойындау және өкініш білдіруді,
- айыпталушының кәмелетке толмаған балаларды асырауындағы адам екенін
жауаптылықты жеңілдететін мән-жайлар ретінде ескерді.
Жауаптылықты ауырлататын мән-жайлар анықталмады.
Соттың қаулысы
Соттың шешімі бойынша К. ҚР ӘҚБтК-нің 442-бабы 3-бөлігімен әкімшілік құқық бұзушылық жасағаны үшін кінәлі деп танылып, оған 19 267 теңге көлемінде айыппұл салынды.
