Астана тұрғыны арзан бағада алтын бұйымдар сатып аламын деп ақшасынан айырылып қалды
Аталған факті бойынша сотқа дейінгі тергеу басталды
Астана қаласының тұрғыны арзан бағада алтын бұйымдар сатамыз деген хабарландыруға сеніп, ақшасынан айырылып қалды, деп хабарлайды Azattyq Rýhy.
Полиция департментінің қызметкерлері интернет-алаяқтық фактісін тіркеді. Белгісіз пайдаланушы әлеуметтік желілер мен сауда платформаларында зергерлік бұйымдарды нарықтық бағадан едәуір арзан бағада сатамыз деген хабарландыру жариялаған.
«Жәбірленуші күдіктіге хабарласып, көрсетілген бұйымдарға қызығушылық танытқан және 100 мың теңге мөлшерінде алдын ала төлем жасаған. Ақшаны алғаннан кейін күдікті байланысқа шықпай қойған. Алданған астаналық полицияға жүгінген», – дейді Астана қаласының Полиция департаменті.
Аталған факті бойынша сотқа дейінгі тергеу басталды.
Полицейлер азаматтарға интернеттегі күмәнді ұсыныстарға сенбеуді және алдын ала төлем жасамауды ескертеді. Сауданы тек ресми және тексерілген платформалар арқылы жүргізу қажет.
