Түркияның бірнеше провинциясындағы жойқын өрт әлі сөндірілген жоқ

Түркияның бірнеше провинциясында өршіген орман өрттері тұрғын аймақтарға, ауыл шаруашылығы алқаптарына және орманды жерлерге таралып, жүздеген адам эвакуацияланды. Құтқару және өрт сөндіру жұмысы әуеден және құрлықтан тәулік бойы жалғасып жатыр, деп хабарлайды Azattyq Rýhy.

Бурса облысындағы Гюрсу ауданында, TOKİ тұрғын үй кешені мен Кестелдегі Аглашан ауылы арасында өрт тұтанып, қатты жел салдарынан лезде таралып кетті. Карахыдыр, Игдир және Авданджык ауылдарының тұрғындары қауіпсіз жерге көшірілді. Сонымен қатар, Орханели ауданындағы Якуплар елді мекенінде тұтанған өрттің беті қайтарылып, толық сөндіру жұмыстары жалғасуда.

Ушак облысының Сиваслы ауданында дуб орманынан басталған өрт орман алқабына таралып, Кетенлик пен Эриджи ауылдарына үлкен зиян келтірді. Тұрғын үйлер мен шаруашылық ғимараттары жанып кетті, жүздеген адам эвакуацияланды.

Мерсин облысының Силифке ауданында, Чадырлы елді мекенінде орман өрті тұтанып, Бахчедереси ауылының кейбір үйлеріне де зақым келтірді. Өрт ауыздықталғанымен, жергілікті тұрғындар айтарлықтай материалдық шығынға ұшырады.

Қахраманмарашта, Чамлыбель орманында тұтанған өртті сөндіруге көршілес провинциялардан арнайы бөлімшелер тартылды. Ал Диярбакыр облысының Лидже ауданы Дуру елді мекеніндегі орман өрті көп сағаттық күрестен соң ауыздықталды. Алдын ала мәлімет бойынша, шамамен 35 гектар орман алқабы жойылған.

Түркия билігінің мәліметінше, AFAD үйлестіруімен және барлық жедел қызметтердің қатысуымен өртті сөндіру жұмыстары үздіксіз жүргізілуде. Ел билігі орман өрттерімен күреске арналған арнайы шараларды қолға алғанын хабарлады.