Петропавлда карантин шараларын бұзғандар анықталды

Петропавлдық полицейлер бір күннің ішінде карантин талаптарын бұзудың 19 фактісін анықтады, деп хабарлайды Azattyq Rýhy тілшісі.

Петропавл полицейлері кәсіпкерлердің карантин шараларын сақтау деңгейін тексерді. Басты назарға жолаушылар көлігі, сауда орындары алынды. Тексеріс жүргізілген 46 нысанның жартысында карантин талаптарын бұзу фактілері тіркелді.

Ең жиі кездесетіні – бетперде пайдаланбау. Мәселен, жеті автобус жүргізушісі маска тақпаған. Тағы бір жүргізушіде медициналық қолғап пен санитайзер болмай шықты. Азық-түлік дүкендеріндегі сатушылардың көп жағдайда бетпердені дұрыс тақпайтыны немесе бетпердесіз жүретіні белгілі болды. Ұсақ сауда орындарында әлеуметтік дистанция сақталмайды. Тұтынушылар ұзын-сонар кезекте тұра береді.

 «Төтенше жағдай режимі тоқтатылғанына қарамастан, облыста карантиндік шектеулер күшін жойған жоқ. Облыстың географиялық орналасуын ескере отырып, жұқтырудың жаңа ошақтары әлі де болуы мүмкін. Өңірдің қауіпсіздігі бірінші кезекте тұрғындардың шектеулерге қаншалықты жауапкершілікпен қарауына байланысты. Бірлескен рейдтік іс-шаралар алдағы уақытта да жалғасады. Оның мақсаты – карантин жағдайындағы жүріп-тұру мәдениетін қалыптастыру», - дейді СҚО ПД бастығы полиция полковнигі Марат Төлебаев.

Рейд барысында карантин талаптарын бұзудың 19 фактісі анықталды. Тәртіп сақшылары жиналған материалдарды ҚР Әкімшілік құқық бұзушылық кодексінің 462-бабы «Мемлекеттік инспекциялар мен мемлекеттік бақылау және қадағалау органдарының лауазымды адамдарына өздерінің қызметтік міндеттерін орындауына кедергі келтіру, қаулыларды, нұсқамаларды және өзге де талаптарды орындамау» бойынша хаттама толтыру үшін Тауарлар мен көрсетілетін қызметтердің сапасы мен қауіпсіздігін бақылау комитетіне тапсырды.

Рейдтер Петропавл қалалық Тауарлар мен қызметтердің сапасы мен қауіпсіздігін бақылау басқармасы мамандарымен бірге жүргізіледі.

Эльмира Мәмбетқызы, СҚО