Оралдан шыққан FlyArystan ұшағы бір топ құсқа соғылған: желіде қорқынышты суреттер тарады
Абырой болғанда ұшақ Астанаға дейін аман-есен жеткен
Бірнеше күн бұрын Орал қаласынан Астанаға қарай бет алған FlyArystan ұшағы бір топ құсқа соғылып, оның қозғалтқышына әжептәуір зиян келгені анықталды, деп хабарлайды Azattyq Rýhy.
Құстар ұшаққа Орал әуежайынан шыға сала соғылған. Абырой болғанда, ұшқыштар жолаушыларды Астана қаласына дейін аман-есен жеткізді.
«2025 жылдың 26 қаңтарында Орал-Астана бағытында ұшқан FlyArystan әуе компаниясының FS 7366 рейсі бір топ құсқа соғылды. Ұшақтың қозғальқышы жұмысын тоқтатпаған соң, экипаж сапарды жалғастыра берген. Ал, Астана әуежайына жеткен кезде ұшаққа әжептәуір зақым келгені анықталған. Тіпті, қозғалтқыштың ішінен құстардың қалдығы табылған», - деп хабарлайды Air Astana компаниясының баспасөз қызметі.
Компания ұшаққа құстың қандай түрлері соғылғанын анықтау үшін табылған материалдарды сараптамаға жіберген.
