«Туды танысаң, құшақта»: қазақ студенті Түркияда ерекше челлендж өткізді (ВИДЕО)
Бұл әрекет қазақ-түрік бауырластығын арттыра түсті
Түркияда білім алып жүрген студент Ерсұлтан Мерекеұлы Қазақстанның Туын арқасына жамылып, түрік халқының әрекетін видеоға түсіріп алған, деп хабарлайды Azattyq Rýhy.
Ерсұлтан Мерекеұлы Түркияның Кайсери университетінде халықаралық сауда және логистика факультетінде білім алып жүр. Оның түсірген видеосы түркиялық БАҚ-та ерекше таралған.
Атыраудың тумасы 2023 жылы білім қуып Түркияға келген. Қазақ студенті қолына «Туды танысаң, құшақта» плакатын ұстап қаланы аралаған. Оның бұл әрекеті түрік бауырлардың ерекше ықыласын тудырды.
«Мен бұл видеоны түсіргендегі мақсатым қазақ-түрік бауырластығын арттырып, біз бір атаның ұрпағы екенімізге тағы бір мәрте көз жеткізу еді. Түрік бауырлар осыншама ықылас танытады деп ойлаған жоқ едім. Олар мені келіп құшақтаған кезде қазақша ән де айтып бердім», - дейді ол.
Түркияда 1,5 жылға жуық тұрып жатқан қазақ студенті түріктердің мейірімін ерекше сезіндім дейді.
