Қарағандыда тұрғын үй өртенді: алты адам құтқарылды (ВИДЕО)

Бүгін Қарағанды қаласындағы Дүйсембеков көшесінде орналасқан тұрғын үйде өрт шықты. Тілсіз жау екінші қабаттағы пәтердің ас үйін шарпып, түтін бүкіл кіреберіске тараған, деп хабарлайды Azattyq Rýhy ТЖМ баспасөз қызметіне сілтеме жасап.

Өрт туралы алғашқылардың бірі болып №7 өрт сөндіру бөлімінің өрт сөндірушісі Наиль Асадуллин хабарлап, тұрғындарды эвакуациялауға кірісті.

«Төтенше жағдайлар министрлігінің (ТЖМ) күшімен алты адам, оның ішінде екі бала құтқарылды. Құтқару қалпақтарын қолдану арқасында тұрғындар қауіпсіз жерге шығарылды. 1949 жылы туған әжеге оқиға орнында медициналық көмек көрсетілді. Өрт толықтай сөндірілген», - делінген хабарламада.

ТЖМ тұрғындарға қауіпсіздік шараларын сақтауды және төтенше жағдай кезінде дереу құтқару қызметіне хабарласуды ескертеді.