Үйінде есірткі шөбін өсірген Шымкент тұрғыны ұсталды
Сараптама нәтижесі бойынша аталған өсімдіктер есірткі затына жатататыны расталды
Шымкентте үйінде есірткі шөбін өсірген азамат анықталып, оған қатысты сотқа дейінгі тергеп-тексеру басталды, деп хабарлайды Polisia.kz.
4 мамырда Шымкент қаласы ПД Есірткі қылмысына қарсы іс-қимыл басқармасының қызметкерлері жедел іс-шараларын жүргізу барысында 53 жастағы Еңбекші ауданы тұрғынының үйінен құрамында есірткі заты бар, өсіруге тыйым салынған өсімдіктерді заңсыз егіп-өсіру фактісін анықтады.
«Үй ауласын тінту барысында есірткі құрамдас өсімдіктерді өсіретін құмыралар табылды. Сараптама нәтижесі бойынша аталған өсімдіктер есірткі затына жатататыны расталды», - делінген хабарламада.
Аталған факті сотқа дейінгі тергеп-тексерудің бірыңғай тізіліміне тіркеліп, ҚР Қылмыстық кодексінің 300-бабының 1-бөлігімен (құрамында есiрткi заттар бар, өсiруге тыйым салынған өсiмдiктердi заңсыз егіп-өсіру) сотқа дейінгі тергеп-тексеру басталды.
