Шерзат Болаттың өлімінен кейін Талғарға жаңа полиция басшысы тағайындалды

Ішкі істер министрінің бұйрығымен Талғар ауданы полиция басқармасының бастығы лауазымының міндетін атқарушы болып полиция подполковнигі Айдар Омаров тағайындалды, деп хабарлайды Azattyq Rýhy.

Оған дейін Талғар аудандық полиция басқармасының бастығы қызметін атқарған Нұржан Күнтүнов 2024 жылғы 19 қазанда қызметінен қуылған.

Естеріңізге салайық, 4 қазан күні Талғар қаласында төбелес болып, 16 жастағы Шерзат Полат кісі қолынан қаза тапты. Көп ұзамай марқұмның отбасы тұратын үй өртеніп кетті. Құқық қорғау органдары бөтеннің мүлкін қасақана өртеу фактісі бойынша қылмыстық іс қозғалғанын хабарлады.

Бастапқыда бұл іске байланысты жеті адам қамауға алынды. Кейін 15 қазанда күдіктілер саны онға жетсе, 17 қазанда тағы бір күдікті қамауға алынған еді.