Баянауылдағы өрт 6 мың гектарға жетті – Асайын Байханов тілсіз жаудың алдын ала себебін болжады

Павлодар облысының әкімі Асайын Байханов Қарағанды облысынан Баянауыл мемлекеттік ұлттық табиғи паркінің ормансыз аумағына өткен өрт 6 мың гектар жерді шарпығанын мәлім етті, деп хабарлайды Azattyq Rýhy.

«Өрт ошақтарын жою орнында өңірлік жедел штабтың отырысын өткіздім. Тілсіз жаумен күресуге барлық қажетті күштер тартылды: өртті 310 адам, 51 арнайы техника, 2 тікұшақ, 3 ұшқышсыз ұшу аппараты сөндіріп жатыр. Қазір өрт оқшауланды, әлі сөнген жоқ. Өңірде құрбандар мен зардап шеккендер жоқ», - деп жазды әкім телеграмм парақшасына.

Әкімнің айтуынша, өрттің себебі – шөп шабатын техникалардың ақауы болуы мүмкін.

«Мұндай өрттердің негізгі себептерінің бірі - шөп шабу кезінде қолданылатын техникалардағы ұшқын сөндіргіш құрылғылардың істемеуі. Сондықтан, барлық шаруа қожалықтарынан міндетті түрде ұшқын сөндіргіш құрылғылар болуы тиіс қолданыстағы техникаларды тексеруді, сондай-ақ, өз шаруашылықтары мен үйлерінің, әсіресе, шөп қоры сақталатын орындардың айналасын уақытында жыртуды сұраймын», - деп жазған Байханов.

Естеріңізге сала кетейік, осы өрттің Қарқаралыдағы жағында бір адам қаза тауып, төрт адамды күйік шалған.