Мақтаарал ауданында 31 мыңнан астам тұрғын эвакуацияланды

Түркістан облысының Мақтаарал ауданындағы су басқан елдімекендерден 2 күннің ішінде 31 606 адам эвакуацияланған. Бұл туралы Түркістан облысының Өңірлік коммуникациялар қызметі хабарлады.

«4 мамыр күнгі ақпарат бойынша Жаңа-Тұрмыс (46 үй), Жеңіс (130 үй), Фирдоуси (250 үй), Өргебас (194 үй), Достық  (11 үй) елдімекендерінен жалпы саны  631 үй су астында қалды», - делінген хабарламада.

2 мамырдан бері Атакент елдімекенінде 24 эвакуациялық бөлім құрылып, жұмыс жүргізуде. 

«Апаттан құтқару жұмыстарына жалпы саны 986 адам, 4 қайық, 180 дана техника тартылған. Полиция тарапынан Жаңа тұрмыс, Фирдоуси, Өргебас, Нұрлыжол, Иіржар елдімекендерінде – бір, Т. Жайлыбаев ауылында екі блок-бекет құрылып, оның жалпы саны 7-ге жетті.  3115 ірі қара мал, 1101 ұсақ мал, 585 жылқы, 34 түйе Келес ауданы, Қызыләскер ауылына жеткізілді. Бұдан бөлек, 1797 ірі қара мал, 6029 ұсақ мал, 689 жылқы, 381 түйе, 165 шошқа Мақтарал ауданындағы су басу қаупі жоқ жерге жеткізілді», - делінген хабарламада.