«Әйелін жағып жіберген соң суицид жасаған»: Тараздағы сұмдық оқиғаның жалғасы

Жамбыл облысы Тараз қаласында кеше әйелімен сөзге келіп қалған 54 жастағы ер адам оның үстіне бензин құйып, үйімен қоса өртеп жіберген. Бұл оқиғаға қатысты облыстың полиция департаменті тағы бір сұмдық деректі хабарлады: ер адам оқиға болған маңнан алыс емес жерде өлі күйінде табылды, деп хабарлайды Azattyq Rýhy.

Алдын ала болжам бойынша, ол әйелін жағып жіберген соң, суицид жасаған.

«Таразда жақында бас бостандығынан айыру орындарынан босатылған 54 жастағы ер адам әйелімен тұрмыстық жанжал кезінде үйді өртеп жіберді. Әйел алған күйіктерінен ауруханада қайтыс болды. Күдікті оқиға орнына жақын жерде өлі күйінде табылды. Оның өлімінің алдын-ала нұсқасы – суицид. Аталған факті бойынша қажетті сараптамалар тағайындалды», - деп хабарлады Жамбыл облысы ПД.

Еске салайық, кеше Тараз қаласында сағат 22:59-да «Шалғай Қарасу» ауданы, Наркескен көшесінде орналасқан жеке тұрғын үйде 100 шаршы метр алаңда өрт шықты. 

Күйік шалған 1980 жылғы әйел ауыр жағдайда ауруханаға түсті. ТЖД хабарлауынша, өрттің алдын ала себебі – қасақана өртеу. Әйел алған күйіктерінен ауруханада қайтыс болды. 

Көршілерінің айтуынша, өрт шыққан кезде үйде балалар да болған. Олардың жағдайы белгісіз.