Таиландтағы әйгілі қонақ үйде алты шетелдіктің мәйіті табылды

Таиланд астанасы Бангкокта орналасқан Grand Hyatt Erawan қонақ үйінде алты адам қайтыс болды, деп хабарлайды Azattyq Rýhy.

Жергілікті Matichon басылымының хабарлауынша, марқұмның үшеуі – ер, үшеуі – әйел адам. Олардың бесеуі бөлмеде, бір адам бөлме сыртынан табылды. Қаза тапқандар – Вьетнам азаматтары, олардың екеуінде АҚШ азаматтығы болған.

Қайғылы оқиға орнына Таиланд премьер-министрі Сетха Тависин келді, ол мұқият тергеу жүргізуді тапсырғанын айтты.

Алдын ала ақпаратқа сәйкес, өлім себебі уланудан болуы мүмкін. Бастапқыда атыс туралы хабарланған, бірақ бұл нұсқа жоққа шығарылды.