«Анам өлім ауызында жатыр»: 5 жасар алматылық анасының өмірін құтқарып қалды

Алматының Бостандық ауданында бес жасар бала есінен танған анасын құтқарып қалды. Бала қиын жағдайда абдырап қалмай, «Солнечный квартал» кешенінің тұрғындарын уақытында көмекке шақырған, деп хабарлайды Azattyq Ruhy.

19 сәуірде Ален есімді бала мен анасы Гүлмира 13-қабаттағы пәтерінде отырған. Бірақ кенеттен әйел есінен танып, еденге құлаған. Сол сәтте бала анасының телефонын ашып, сол жерден тұрғындардың чатын тауып, дауыстық хабарламалар жіберген. 

Дәлірек айтсақ ол «Көмектесіңіздер, анам өлім ауызында жатыр. Дәрігерге қоңырау шалыңыздар» деген аудиожазба қалдырған. Оқиға сағат 9:55-те болған.

«Анасы оған бірдеңе болса, қоңырау шалу керегін үйретіп қойған. Ол бірден көршілерінің телефон қоңырауына жауап беріп, барлық қажетті деректерді анық айтып берді. Тұрғындар дереу жедел медициналық көмекке шақырды. Бала есікті ашып, барлығымызды қарсы алды», - дейді жергілікті «КСК» төрағасы Арман Әмірғалиев.

Дәрігерлер сағат 10:22-де келіп, әйелге алғашқы көмек көрсеткен.

Дәрігерлер келгенде Гүлмира көзін әрең ашып, сөйлей алмаған. Дәрігерлер оны ауруханаға апару туралы шешім қабылдады. Көршілері оның кәмелетке толған қызына қоңырау шалып, шақырған. Екінші қызы Аленмен қалды.

«Ол өте жақсы әрекет еткен. Тұрғындармен бірлесіп анасының жағдайы жақсарған кезде оған сыйлық алуды жоспарлап отырмыз. Елестетіп көріңізші, Ален тіпті бізге дастархан жайғысы келді. Ол тоңазытқышты ашып, нан мен май алды, «шай ішесіздер ме? деп сұрады», - дейді КСК төрағасы.

CMN.kz хабарлағандай, көршілер баланың төтенше жағдайға жедел әрекет еткенін мойындап отыр, өйткені анасы оны дүрбелеңге салуға емес, шұғыл көмек шақыруға үйреткен.

Әйелдің қазіргі денсаулығы әлі белгісіз. Сондай-ақ ол қай ауруханада жатқаны туралы да ақпарат жоқ.