Қостанай облысында полицейлер ер адамның боранда үсіп қалуына жол бермеді

13 ақпанда кешке Лисаков қаласының тұрғыны ұлының жоғалып кеткені туралы хабарлады. Екі дос сол күні қатты боранға қарамастан Новоильиновка ауылына сапарға шыққан. Жолда ұрысып қалып, жолаушы жаяу жүруге шешім қабылдайды, деп хабарлайды Azattyq Ruhy Polisia.kz-ке сілтеме жасап.

Жергілікті полиция бөлімінің учаскелік инспекторы Данабек Игымбердиев пен патрульдік полиция қызметкері Алибек Жүнісов дереу іздеуге кіріседі.

«Мен бұл аймақты жақсы білемін. Өйткені, осында 3 жылдан бері жұмыс істеймін. Әріптесім екеуміз қызметтік көлікті жолдың жиегіне қалдырып, далада ер адамды іздедік. Біз оны қардың үстінде жатқан жерінен тауып алдық. Сол жерде бір жарым сағаттан астам жатып қалған және ұйықтап кетуі мүмкін еді», - дейді Данабек Игымбердиев.

Жоғалған жігіттің анасы полицейлерге жалғыз ұлын құтқарғаны үшін алғыс айтты. Қостанай облысының Полиция департаменті жүргізушілерді төтенше жағдайларға қатысты хабарламаларды ескеруге және қауіпсіздік шараларын қатаң сақтауға шақырады.