Түркістан облысында жаназа кезінде телефон ұрлаған әйел ұсталды

Түркістан облысы полицейлері жаназаға барып, ұялы телефон ұрлап кеткен әйелді ұстады, деп хабарлайды Polisia.kz.

Қазығұрт аудандық полиция бөлімшесіне Ордабасы аудандық полиция бөлімшесінен  жергілікті тұрғынының арызы келіп түседі.

Жәбірленушінің айтуынша, ол Қазығұрт ауданына туысының жаназасына келген, содан сол үйде отырған жерінде ұялы телефонын қалдырып кетіп, қайта үйге кірген кезде телефоны болмай шыққан. Осылайша, белгісіз тұлға жәбірленушінің «Самсунг» маркалы телефонын ұрлап, 100 000 теңгеден астам шығын келтірген.

«Аталған жайт Қазығұрт АПБ-мен тіркеліп, ҚР Қылмыстық кодексінің 188-бабы (ұрлық) бойынша енгізілді. ​​​​Қазаға келіп, телефонынан айырылған әйелге көмектесіп, қылмысты ашу мақсатында полицейлер тарапынан барлық қажетті іс-шаралар іске асырылды. Ұялы телефонның жеке кодтары бойынша жедел-іздестіру жұмыстары жүргізілді», - делінген ПД хабарламасында.

Нәтижесінде, полицейлер екі күн ішінде күдіктіні анықтап, ұстады. Ол жергілікті тұрғын, егде жастағы әйел болып шықты.​​​​​​Тергеу барысында анықталғандай, күдікті әйел иесі ұмытып қалдырып кеткен телефонды жасырын алып сатып жіберген.

Ақшасын өз пайдасына жаратқан. Полицейлер жоғалған телефонды айғақты зат ретінде алып, заңды иесіне қайтарды. Қазіргі таңда сотқа дейінгі тергеу амалдары жүргізіліп жатыр.