Қарағанды облысында автобус пен жеңіл көлік апатынан екі адам қаза тапты

Қарағанды облысында жол апатынан екі адам қаза болды, деп хабарлайды Azattyq Ruhy.

Облыстық полиция департаментінің хабарлауынша, қайғылы оқиға 15 қазанда Қарағанды – Молодежный тасжолында болған.

«Қазақстан ауылынан 2 шақырым жерде Hyundai Sonata көлігі мен Neoplan автобусы соқтығысты. Жол-көлік оқиғасының салдарынан Hyundai Sonata автокөлігінің екі жолаушысы оқиға орынында қаза болды.

Аталған дерек бойынша ҚР Қылмыстық кодексінің 345 бабы 3 тармағына сәйкес қылмыстық іс қозғалды. Тиісті сараптамалар тағайындалды. Тергеу әрекеттері жүргізілуде», - деді Осакаров аудандық полиция бөлімінің бастығы Азиз Жұмағазиев.

Қарағанды облысының полиция департаменті көлік жүргізушілерден жылдамдықты шектен тыс асырмай, жол жүру ережесін қатаң сақтауды еске салады.