Павлодарда жас қыз зейнеткердің 2,5 млн теңгесін қолды қылды

Павлодарда жас қыз зейнеткердің 2,5 млн теңгесін қолды қылды, деп хабарлайды Azattyq Ruhy.

Облыстық полиция департаменті баспасөз қызметінің мәліметінше, полицияға 82 жастағы зейнеткер өтінішпен жүгінген. Қала тұрғынының үйінің кіреберісінде 20-25 жас аралығындағы белгісіз қыз алдау жолымен 2,5 млн теңге сомасында ақша қаражатын иеленгені анықталды. 

«Зейнеткер немересінің қала телефонына қоңырау шалып жылап, ақша сұрағанын түсіндірді. Ол өзінің кесірінен жол-көлік оқиғасы болғанын, жүргізуші зардап шеккенін, оған операцияға және қылмыстық істі тоқтатуға шұғыл ақша қажет екенін айтып сендірген. Осылайша қала тұрғыны кіреберісте белгісіз қызға ақша берген», – деді департаментте. 

Аталған фактіге қатысты Қазақстан Республикасы ҚК 190-бабы 2-бөлігі бойынша сотқа дейінгі тергеу жүргізіліп жатыр.

Тергеу барысында күдікті Telegram мобильді қосымшасында жұмыс іздеу барысында чатқа кіргені анықталды, онда оған ақша қаражатын тасымалдау және аудару үшін курьер жұмысын ұсынған. 25 жастағы қала тұрғыны осыған ұқсас үш қылмыс жасады деген күдікке ілінді. Осы факті бойынша Қазақстан Республикасы ҚК 190-бабы 3-бөлігіне сәйкес сотқа дейінгі тергеу жүргізілуде.