Жамбыл облысында өмір бойына көлік жүргізу құқығынан айырылған ер адам жол апатына себепкер болды

Жамбыл облысында өмір бойы көлік жүргізу құқығынан айырылған ер адам қайтадан мас күйінде көлік руліне отырып, салдарынан жол көлік оқиғасы тіркелді, деп хабарлайды Azattyq Ruhy облыстық полиция департаментінің баспасөз қызметіне сәлтеме жасап.

Байзақ ауданы полиция бөлімінің кезекші бөліміне 19 жастағы жергілікті тұрғыннан ЖКО туралы шақырту келіп түсті. Жас жігіттің сөзінше, сағат 18:30-да Сарыкемер ауылындағы көшелердің бірінде «ВАЗ-21099» маркалы автокөлігін басқарған ер адам оның «Volkswagen Golf 3» маркалы көлігімен соқтығысқанын хабарлаған.

Оқиға орнына келген полиция қызметкерлері мас күйіндегі белгілері бар құқық бұзушыны ұстады. Ол Сарыкемер ауылының 32 жастағы тұрғыны болып шықты. Ер адам медициналық куәландыру орнына жеткізілді. Тексеру  қорытындысына сәйкес, ол рульде ауыр дәрежелі мас күйінде болған.  Сонымен қатар, 32 жастағы жүргізушінің осындай құқық бұзушылық жасағаны үшін соттылығы бар екендігі де анықталды. 2021 жылдың қарашасында сот оны 2,5 жыл мерзімге бас бостандығын шектеп, өмір бойы көлікті басқару құқығынан айырған.

Осы дерекке қатысты ҚР ҚК 346-бабының 2-бөлігі бойынша (Көлік құралдарын басқару құқығынан айырылған және мас күйінде жүрген адамның көлік құралын басқаруы) сотқа дейінгі тергеу амалдары жүргізілуде. Тиісті сараптамалар кешені тағайындалды. Күдікті уақытша ұстау изоляторына қамаққа алынды.

«Полиция қызметкерлері жүргізетін үздіксіз және күнделікті профилактикалық іс-шараларға қарамастан, кейбір жүргізушілер тарапынан заңды құрметтемейтін, жол қозғалысының барлық қатысушыларының қауіпсіздігіне қауіп төндіретін осындай құқық бұзушылық деректері анықталуда. Әрбір адам мас жүргізушінің қылмыскер екенін білуі керек. Көбінесе мас күйінде көлік басқарған адамдар салдары ауыр көлік апатына себепкер болуда. ҚР ҚК-нің 346-бабы 2-бөлігінің санкциясына сәйкес, 6 жылға дейінгі мерзімге бас бостандығынан айыру және көлік құралын басқару құқығынан өмір бойына айыру жазасы көзделген», — деп хабарлады Жамбыл облысының ПД ЖПҚБ  бастығының орынбасары полиция подполковнигі Ержан Мананбаев.