Астанада жалған шот-фактура жасаумен айналысқан қылмыстық топ сотталды

Астана қаласының Қылмыстық істер жөніндегі ауданаралық соты іс жүзінде еш жұмыс орындамастан, ешқандай қызмет көрсетпестен және тауар жөнелтпестан жалған шот-фактура жасаумен айналысқан ер адам мен оның сыбайластарын айыпты деп тапты, деп хабарлайды Azattyq Ruhy.

«О. есімді ер адам А., Қ., С. және Н.-ның қатысуымен 2020-2022 жылдар кезеңінде өзі бақылайтын жеті кәсіпорынның атынан еш қызмет көрсетпестен және тауар жөнелтпестен шот-фактуралар берумен айналысқан, сол арқылы мемлекетке аса ірі көлемде, яғни  773 млн теңгеден астам залал келтірген», - делінген сот хабарламасында.

Сонымен бірге О. қылмысты ұйымдастырушы ретінде өз бақылауымен жалған шот-фактураларды жазып, сондай қызметке мұқтаж контрагенттерді іздестірген, олармен мәміле жасау шарттарын жүргізген.

«Өз кезегінде, А., бұрын мемлекеттік кірістер органдарының қызметкері болғанына байланысты, О.-ға аталған кәсіпорындарды тіркеуге және жойып отыруға көмектескен, салық бөлігі бойынша кеңес берген. Ал Қ., С., және Н. ұйымдастырушының өтініші бойынша өз таныстарының, сондай-ақ кездейсоқ адамдардың атына кәсіпорынлар ашқан. Қ. Сондай-ақ сол кәсіпорындардың шотына түскен қаражатты қолма-қол ақшаға айналдырумен айналысқан», -делінген хабарламада.

Сот қылмысты ұйымдастырушы мен оның сыбайластарын Қылмыстық кодекстің 216-бабының 3-бөлігі бойынша кінәлі деп тапты.

«Сот ұйымдастырушы О.-ны коммерциялық ұйымдарда басшылық қызмет атқару құқығынан айыра отырып, 4 жылға бас бостандығынан айырды. Сот оның сыбайластары А., Қ., С. және Н.-ны коммерциялық ұйымдарда басшылық қызмет атқару құқығынан айыра отырып, 3 жылға бас бостандығынан айырды», - деп хабарлайды Астана қалалық сотының баспасөз қызметі.

Олар бақылайтын кәсіпорындардың есепшотында болған 15,5 миллион теңге мемлекет кірісі ретінде тәркіленді. Іс бойынша азаматтық талап қойылмаған, қарыз сомасы контрагент кәсіпорындардан өндіріліп жатыр.

Сот үкімі заңды күшіне енген жоқ.