Екібастұзда ер адам суға батып кетті

Екібастұзда ер адам суға батып кетті. 1981 жылы туған азамат шомылуға тыйым салынған орында суға түскен, деп хабарлайды Azattyq Ruhy.

Облыстық ТЖД баспасөз қызметінің мәліметінше, үш құтқарушы мен бір техника 3 маусым күні сағат 16:28-де Екібастұз қаласында Зеркалка су айдынында 1981 жылы туған адамды іздестіру шараларын жүргізген. 

«Ол шамамен сағат 15:20-да шомылуға арнайы жабдықталмаған жерде суға түсу кезінде батып кетті. Ер адам достарымен бірге демалып отырған», – деді департаментте. 

Құтқарушылар жас жігіттің денесін сағат 16:56-да тауып, жағаға шығарды.

ТЖ департаменті рұқсат етілмеген жерлерде шомылуға тыйым салынғанын және құқық бұзушыларды әкімшілік жауапкершілік күтетінін еске салады.