Астанада жыл басынан бері 6 бала терезеден құлап кеткен
Полицейлер ата-аналарға балалар қауіпсіздігі ережелерін сақтау қажеттілігі туралы ескертеді
Елордада жыл басынан бері 6 бала терезеден құлап кеткен, деп хабарлайды Azattyq Ruhy Ішкі істер министрлігіне сілтеме жасап.
Жыл басынан бері Астанада балалардың терезеден құлауының 6 дерегі тіркелді. Қуанышқа орай, барлық балалар тірі қалған, алайда жарақат алған.
Соның бірінде полицияға үйдің үшінші қабатынан баланың құлап кеткені туралы қоңырау келіп түскен. 2 жасар бала үйде үлкен балалармен қалған және терезеге көтеріліп, масаға қарсы торға сүйеніп тұрып құлап кеткені анықталды. Бүлдіршін ауруханаға жатқызылды.
Полиция қызметкерлері тағы да ата-аналарға балалар қауіпсіздігі ережелерін сақтау қажеттілігі туралы ескертеді. Құлаудың басым көпшілігі ересектердің балалардың жүріс-тұрысын бақыламауынан, терезелерді жабуды ұмытып кететін жақын туғандарының немқұрайдылығынан, терезелерде блок-құлыптардың болмауынан, балаларға терезеге өздігінен көтерілуге мүмкіндік беретін жиһаздың дұрыс орналаспауынан және терезе жабық тұрғандай иллюзия тудыратын масаға қарсы торлардың болуынан туындайды.
