СҚО-да Орталық Азия елдерінің бірінен заңсыз келген балалар анықталды
5 жастан 15 жасқа дейінгі балалардың тиісті құжаттары болмаған
СҚО-да Орталық Азия мемлекеттерінің бірінен келген балалар анықталды, деп хабарлайды Azattyq Ruhy.
Облыстық полиция департаментінің хабарлауынша, 18 сәуірде ведомство ҚР ҰҚК СҚО бойынша департаментімен бірлесіп жедел-іздестіру іс-шаралары барысында Петропавл қаласында 7 пәтерді тексерді.
«Онда Орталық Азия мемлекеттерінің бірінен келген 5 жастан 15 жасқа дейінгі балалар анықталды. Балалардың ҚР аумағында заңды түрде болуын растайтын құжаттар болмады», - делінген хабарламада.
Тұрғын үй-жай беру жолымен заңсыз көші-қонды ұйымдастыру, сондай-ақ шетелдіктерге ҚР аумағына заңсыз кіру, шығу, ел аумағында жүріп-тұру үшін өзге де қызметтер көрсету белгілері болуына байланысты, аталған деректі 19 сәуірде ПБ ҚР ҚК 394-бабының 2-бөлігі бойынша Сотқа дейінгі тергеп-тексерулердің бірыңғай тізілімінде тіркеліп, сотқа дейінгі тергеу басталды.
«Қазір жедел-тергеу тобы құрылды, тергеу әрекеттері, анықталған тұлғалардан, оның ішінде кәмелетке толмағандардан да жауап алу жүргізілуде, қажетті сараптамалар тағайындалды», - делінген хабарламада.
