Мексиканың көші-қон орталығында 35 мигрант тірідей өртеніп кетті

Мексиканың АҚШ-пен шекаралас Сьюдад-Хуарес қаласындағы миграциялық орталықта өрт шығып, кем дегенде 35 мигрант қаза тапты, 100-ге жуық адам жарақат алды, деп хабарлайды Azattyq Ruhy.

Excelsior басылымының жазуынша, зардап шеккендер көмірқышқыл газынан уланған, кейбірінің жағдайы өте ауыр.

Басылымның жазуынша, өрт АҚШ-қа заңсыз жолмен өтпек болған мигранттарды ұстау абақтысынан шыққан. Өртке аталған федералды көші-қон орталығында ұсталған мигранттар себеп болған көрінеді.

Белгілі болғандай, бір топ венесуэлалық мигрант қашып шығу үшін матрастар мен киім-кешек, жиһаз жинап, өрт қойған.

Зардап шеккендердің басым көбі алкогольді ішімдік салдарынан мас күйде болған.

«Сағат 11:30-дағы жағдай бойынша Сьюдад-Хуарестің азаматтық қорғаныс органдары 35 адамның өлгенін және жүзге жуық адамның мас күйінде жараланғанын хабарлады. Зардап шеккендер шекаралық ауруханаларға жеткізілді», - делінген хабарламада.