Шымкентте 21 адам бруцеллез жұқтырған
Инфекция тек сиырлардан ғана емес, басқа жануарлардан да жұққан
Шымкентте 21 адам бруцеллез жұқтырған. Санитарлық дәрігерлер аурудың өсуін жануарлар арасындағы қолайсыз эпизоотиялық жағдаймен байланыстырады. Санитарлық дәрігерлер инфекцияның таралу ошақтарынан сүт пен сүт өнімдерінің 114 сынамасын алды. Олардың 9-ы бруцеллезге оң нәтиже берді, деп хабарлайды Azattyq Ryhy Otyrar.kz-ке сілтеме жасап.
«Инфекция тек сиырлардан ғана емес, қой, ит және басқа жануарлардан да жұққан. Инфекцияның көзі көп болып отыр. Егер бір жерде болса, «бәрі бір көзден тарады» дер едік. Бірақ ошақ жалғыз емес. Зардап шеккендердің барлығы әртүрлі көздерден жұқтырған», - дейді Шымкент қаласы санэпидбақылау департаментінің басшысы Әбдіманап Төлебаев.
Санитарлық дәрігерлер инфекция тек мал арқылы ғана емес, басқа жануарлар арқылы да таралатынын айтады. Бруцеллез инфекциясын болдырмау үшін дәрігерлер сүт пен етті мұқият термиялық өңдеуден өткізуді ұсынады.
