ШҚО-да аулада марихуана шеккен жігіт Сергек камерасына түсіп қалды
Аталған факті бойынша сотқа дейінгі тергеу жүргізіліп жатыр

Облыс орталығындағы аулада марихуана шеккен жігіт Сергек камерасына түсіп қалды, деп хабарлады Polisia.kz.
ШҚО ПД баспасөз қызметінің хабарлауынша, полиция қызметкерлері есірткіні пайдаланған және сақтаған деген күдікпен 21 жастағы қала тұрғынын ұстаған. Құқық бұзушы Сергек АБК камераларының біріне түсіп қалған.
Бейнебақылау камерасы заңсыз әрекетті тіркегеннен кейін бірнеше минут өткен соң оқиға орнына тәртіп сақшылары келген. Полицейлерді көре салысымен жас жігіт “темекі шегу аппаратын” тастауға асыққанымен, үлгермей қалған.
Сараптама көрсеткендей, жігітті ұстау кезінде ол каннабиноидтарды қолданудан туындаған есірткіге масаң күйде болған.
Полицейлер жас құқық бұзушыдан фольгасы бар пластикалық бөтелке мен спецификалық иісі бар қоңыр-жасыл түсті өсімдік заты салынған бір қағаз ораманы тәркіледі.
“Сараптама қорытындысына сәйкес алынған зат жалпы салмағы 1,51 грамм кептірілген марихуана болып шықты. Аталған факті бойынша ҚР ҚК-нің 296-бабы 2-бөлігі (Есiрткi, психотроптық заттарды, сол тектестерді өткізу мақсатынсыз заңсыз дайындау) бойынша сотқа дейінгі тергеу жүргізілуде”, – делінген ведомство хабарламасында.