Өскеменде 65 млн теңгенің заңсыз кен тасымалына қатысы бар шенеунік ұсталды
РММ басшысы өзінің қызметтік жағдайын асыра пайдаланған
Шығыс Қазақстан облысы бойынша Сыбайлас жемқорлыққа қарсы қызметі «ШҚО бойынша көліктік бақылау инспекциясы» РММ басшысын әшкереледі, деп хабарлайды Azattyq Ruhy.
Белгілі болғандай, ол 2021-2022 жылдар аралығында өзінің қызметтік жағдайын асыра пайдаланған.
«РММ басшысы пайда табу мақсатында рұқсат етілген салмақтық параметрлерден асып түсетін (артық тиеумен) кенді тасымалдаумен айналысатын үлестес ЖШС-ны әкімшілік жауапкершіліктен алып тастаған. Бұл өз кезегінде бюджетке 65,5 млн теңге сомасында алымдар түспеуге әкеп соққан», - делінген хабарламада.
17 қыркүйекте Өскемен қаласының тергеу соты күдіктіге қатысты «күзетпен ұстау» түріндегі бұлтартпау шарасын санкциялады.
Қазіргі уақытта сотқа дейінгі тергеу жүргізіліп жатыр.
«Қылмыстық іс жүргізу кодексінің 201-бабына сәйкес өзге де ақпарат жария етуге жатпайды», - делінген ведомство хабарламасында.
