«Мені жеп қоюы мүмкін еді»: Ақтауда итбалық судағы ер адамға шабуылдаған

Ақтауда тағы бір демалушыға итбалықтың шабуылына ұшырады, деп хабарлайды Azattyq Ruhy. 

Lada басылымының жазуынша, оқиға 20 тамызда Ақтаудағы жағажайында болған.

Жергілікті тұрғын Нұрлан Наурызбековтің айтуынша, ол достарымен Rixos қонақүйінің артындағы жағажайда, жағалауға жақын жерде жүзіп жүргенде біршама алыс қашықтан үлкен итбалықты көреді. Көп ұзамай итбалық 25 жастағы жігітке тарпа бас салған.

Жәбірленушінің айтуынша, итбалықтың ұзындығы бір метрдей болған. Ол жігіттің арқа тұсынан келіп қолын тістеп, арқасы мен иығын тырнап алған.

«Достарыммен жүргенімде, алысырақ тұста итбалық жүргенін көріп қалдық. Содан соң тағы жарты сағаттай суға түстік. Барлығы судан шығып кетіп, менің жалғыз қалғаным сол еді, күтпеген тұстан итбалық шабуыл жасады! Барлығы итбалықты зиянсыз тіршілік иесі деп ойлайды. Бірақ шындығында олай емес, ол да жыртқыш жануар және теңізден тамағын іздейді. Достарым болмағанда, мені жеп қоюы мүмкін еді», – дейді Нұрлан.

Еске салсақ, 20 тамызда Ақтауда итбалық екі баланы тістеп алған болатын. Сондай-ақ шілде айында әлеуметтік желіде Ақтауда жағажайға барушылардың итбалыққа тас лақтырып жатқаны түсірілген кадрлар тараған.