Алматы облысында мас ер адам кішкентай қызды таспен ұрып, басын жарған
Қазіргі кезде 8 жасар қыз бала облыстық балалар ауруханасында жатыр
Алматы облысында мас ер адам таспен ұрып, кішкентай қыздың басын жарған, деп хабарлайды Azattyq Ruhy.
Облыстық полиция департаментінің мәліметінше, оқиға 10 шілде күні болған.
Белгілі болғандай, бала-шағалы отбасы демалу үшін Алакөлге барып, жағалаудан пансионат іздеген. Жолда Ақши ауылында белгісіз мас адам олардың көлігіне тас лақтырған. Соның салдарынан 8 жасар қыз басынан ауыр жарақат алған.
«Ұйымдастырылған жедел-іздестіру іс-шаралары барысында демалушылардың бірі ұсталды, ол Жаркент қаласының 28 жастағы тұрғыны болып шықты. Ол өз әркетін мас күйде істегенін айтты. Аталған дерек бойынша тиісті сараптамалар тағайындалып, ҚР Қылмыстық кодексінің 293-бабы (Бұзақылық) бойынша қылмыстық іс қозғалды. Тергеу барысында құқық бұзушыға қатысты «келуге міндетті» процессуалдық мәжбүрлеу шарасы таңдалды. Іс бойынша барлық тергеу әрекеті облыстық полиция департаментінің ерекше бақылауына алынды», - деп хабарлады ПД баспасөз қызметі.
Қазіргі уақытта кішкентай қыз облыстық балалар ауруханасында жатыр.
