Екібастұзда көпқабатты үйден шыққан өрттен екі бала құтқарылды

Екібастұзда бес қабатты тұрғын үйден өрт шығып, екі бала құтқарылды, деп хабарлайды Azattyq Rýhy.

Екібастұз қалалық төтенше жағдайлар департаментінің хабарлауынша, 20 маусымда сағат 10.45-те №2 мамандандырылған өрт сөндіру бөлімінің байланыс пунктінің пультіне Сәтпаев көшесі, 22/3 мекенжайында балконның жанып жатқаны туралы хабарлама түскен.

«Оқиға орнына жеткен өрт сөндірушілер 5 қабатты көппәтерлі тұрғын үйдің 2-қабатындағы 3 бөлмелі пәтердің балконынан өрт шыққанын, өрттің артынша асүйге тарағанын анықтады. Өрт салдарынан пәтерге кіретін подъезді қалың түтін басып қалған. №2-МӨСБ өрт сөндіруші-құтқарушы азаматтық қорғау кіші сержанты Ерболат Төлеутаев өрт ішінен 2014 жылы туған баланы алып шыққан. Ал бесінші қабаттағы пәтерден 2-МӨСБ аға инженері азаматтық қорғау аға лейтенанты Дидар Түсіпов 2013 жылғы баланы құтқарды», - делінген ТЖД хабарламасында.

Өрт сөндіру бөлімшесі келгенге дейін 6 адам, оның ішінде 1 бала өз бетінше эвакуацияланған. Өрттен қаза болғандар мен зардап шеккендер болған жоқ.