Қостанайда 5-сынып оқушысы төрт баланы өрттен құтқарып қалды

Қостанайда 5-сынып оқушысы өртеніп жатқан саяжай үйінен төрт баланы құтқарып қалды, деп хабарлайды Tengrinews.kz. 

Өрт 25 желтоқсанда түстен кейін Қостанайдағы "Садовод" саяжай үйлерінің бірінен шыққан. Ол уақытта 5-сынып оқушысы Олег Пирог далада ойнап жүрген, кейін қалың түтінді байқап, көршілерінің үйі жанып жатқанын көрген. 

"Үйдің төбесі отқа оранған екен. Қоршауда тесік болған, содан өтіп, балалар қағып жатқан терезені итердім. Күртешемді шешіп, қарға қойдым, сөйтіп терезеден бір-бірден алып шыға бастадым, өйткені есік жанып жатты. Бір баланың үстінде киім жоқ екен, оған шалбар тауып бердім. Төртінші баланы құтқаруға кірмек болғанымда, бір ер адам келіп, өзі кірісті. Адреналиннің күшімен қорқыныш болмады", - дейді бала.

Мектеп оқушысының айтуынша, ол ер адаммен бірге көшеде қатып қалған газ баллонын алыс қойған. Кейін өртсөндірушілер мен ата-анасы келген. Балалар аман-сау, барлығының жасы екіден сегізге дейін.

Ал облыстық ТЖ Департаменті өртке пешті дұрыс пайдаланбау себеп болуы мүмкін екенін мәлімдеді.

"Оқиға орнында төрт техника, өрт сөндіру қызметі жеке құрамынан 17 адам және қаланың басқа да шұғыл қызметтері жұмыс істеді. Өрт сөндірушілер жанып жатқан үйден екі газ баллонын алып шықты. Құтқарушылар өртті сағат 12.07-де оқшаулап, көрші саяжай учаскелеріне таралу қаупін жойды. Сағат 12.28-де өрт сөндірілді", - деп хабарлады Қостанай облысы ТЖ Департаментінің баспасөз қызметі өкілі.