Алматыда көпқабатты үйден өрт шығып, ер адам көз жұмды

Алматыда тұрғын үйде шыққан өрттен бір адам мерт болды, деп хабарлайды Azattyq Rýhy ҚазАқпаратқа сілтеме жасап.

«Өрт туралы ақпарат төтенше жағдайлар департаментіне 8 қараша күні таңғы сағат 06:41 кезінде түскен. Өрт сөндірушілер Бостандық ауданы «Қазақфильм» шағын ауданындағы мекенжайға жоғары дәрежедегі шақыртуға шықты. Өрт сөндірушілер келген кезде бес қабатты үйдің бірінші қабатының баспалдағын қою қара түтін басқан», - делінген хабарламада.

Тұрғындардың басым бөлігі пәтерінен сыртқа шығып үлгерген.

Ал өртке оранған пәтерге газ-түтіннен қорғау қызметінің мамандары құтқару құралдарының көмегімен темір торды бұзып, ас үйде қамалып қалған 75 жастағы үй иесін шығарды.

Әжесі екі немересін қауіпсіз жерге шығарып үлгерген. Барлау кезінде үш бөлмелі пәтердің бірінде ер адамның бар екені туралы айтылды.

Іздестіру-құтқару жұмыстары барысында жанып жатқан бөлменің ішінен 1977 жылы туған ер адамның денесі табылды.

Зардап шеккендер жедел жәрдем бригадасына тапсырылды.

Өртті сөндіруге 30 қызметкер, 6 техника жұмылдырылды.

Өрт қуаттап қойған электросамокаттан шығуы мүмкін деген болжам бар.