Нұр-Сұлтанда тағы бір қыз көпірден секіріп өлмек болды

Полиция келгенше, оны таксист құтқарып үлгерді, деп хабарлайды Azattyq Rýhy.

Оқиға бүгін, 11 қазан күні таңертең тіркелген. Қабанбай батыр даңғылы арқылы өтетін көпірде жас қыз киімін шешіп, көпірдің шетіне қарай жақындаған.

«Полицияға таңғы сағат 07.20-да хабар түсті. Сақшылар оқиға орнына шұғыл аттанып кетті. Алайда, қыз полиция жеткенше шешініп, көпірден секіруге әрекеттеніп үлгерген. Абырой болғанда, қызды жол-жөнекей кетіп бара жатқан таксист құтқарып қалды», - деп хабарлады Azattyq Rýhy-на қалалық полиция департаментінің баспасөз қызметі.

Жас жігіттің аты-жөні - Дархан Жақсылықов. 28 жастағы жігіттің айтуынша, ол келгенше суицид жасамақ болған қызды тағы бір бойжеткен сөзге айналдыра тұрған. Бірақ, өлімге асыққан қыз көпірдің қоршауынан асып түсіп секіре жаздаған. Дәл сол сәтте таксист жігіт оны ұстап алған.

«Өзімді ерлік жасадым деп ойламаймын. Жас қыздың жанынан ешнәрсе көрмегендей өте алмадым. Түрлі себепке байланысты қиындыққа тап болған адамға көмектесу әркімнің болсын азаматтық борышы деп білемін», - деді Дархан.

Қазір суицидке әрекеттенген қызды дәрігерлер тексеріп жатыр.

Естеріңізге сала кетейік, жуырда Нұр-Сұлтанда жүкті келіншек көпірден секіріп кеткен болатын. Оны полиция қызметкері құтқарған еді.