Ақтөбеде екі баланы қаққан көлік жүргізушісі іздестіріліп жатыр

Полиция жол-көлік оқиғасының куәгерлерін де іздейді

Фото ашық дереккөзден

Ақтөбеде кәмелетке толмаған екі баланы қағып, оқиға орнынан ізін суытқан көлік жүргізушісі іздестіріліп жатыр, деп хабарлайды Azattyq Rýhy.

«Биыл 3 қазан күні сағат 19.40-та алдын ала болжам бойынша «Хюндай» маркілі автокөліктің жүргізушісі Ақтөбе қаласында Ораз Тәтеұлы мен Мәңгілік Ел көшелерінің қиылысында балаларды қағып кетіп, алғашқы медициналық көмек көрсетпестен, белгісіз бағытқа қашып кеткен. Аталған жол-көлік оқиғасының куәгерлері жедел жәрдем мен полицияны шақырған. Қазіргі уақытта полиция қызметкерлері ЖКО кінәлісін анықтау және ұстау бойынша жедел-іздестіру іс-шараларын жүргізуде», - делінген облыстық ПД хабарламасында.

Кәмелетке толмаған екі бала облыстық балалар ауруханасына жеткізіліп, медициналық көмек көрсетілгеннен кейін үйлеріне жіберілді.

Полиция департаменті осы жол-көлік оқиғасының куәгерлерінен «102» нөміріне қоңырау шалуды сұрайды.

×
Бұл желілік ресурстың ақпараттық өнімдері 18 жастан асқан адамдарға арналған.