ШұғылҚазақстанда коронавирус жұқтырғандар саны күрт өсті

Алматы облысында 36 жастағы майорды атып кетті

Облыстық полиция департаменті адам өлтіру бабы бойынша қылмыстық іс қозғады, ал Ішкі істер министрі әскери бөлім қызметкерінің өлімін өз бақылауына алды

Фото: ашық дереккөзден

Алматы облысында әскери бөлімше басшысының орынбасарын атып кетті. 36 жастағы майордың денесі өзі тұратын үйдің алдынан табылған, деп хабарлайды Azattyq Rýhy тілшісі ktk.kz-ке сілтеме жасап.

Рүстем Жанықбаев Талдықорғандағы №48386 әскери бөлімшеде қызмет еткен. Сондықтан марқұмның әкесі бұл қастандық оның қызметіне тікелей қатысты болуы мүмкін дейді. Алайда майорды мерт қылғандардың кім екені әзірге белгісіз. Тәртіп сақшылары әскериге оқ атқандарды іздеуге кірісті.

Рүстем Жанықбаевтың өлі денесі өзі тұратын үйдің алдынан кеше кешқұрым табылған. Талдықорғандағы Қаратал ықшамауданындағы аулада жатқан марқұмды куәгерлер көріп, жедел-жәрдем шақыртқан екен. Алайда дәрігерлер келгенше 36 жастағы майор жан тапсырған. Оны белгісіз біреулер аңшы мылтығымен басынан атыпты.   

Полицейлер кешелі бері күдіктілерді іздестіріп жатыр. Жақын маңдағы бейнекамералар тексеріліп, қанды қылмысты көрген куәгерлер іздестірілуде. Алайда әзірге ешқандай ілік жоқ.    

«Аталған дерекке қатысты жедел іздестіру тобы құрылды. Топтың құрамына тәжірибелі мамандар жұмылдырылды. Қазір қылмысқа қатысы бар тұлғаларды анықтауға бағытталған кеңауқымды іздестіру жұмыстары жүргізіліп жатыр», - дейді Алматы облыстық ПД ресми өкілі Серік Үпиев.

Қаскөйлердің қолынан қаза тапқан майордың артында екі баласы қалды. Ал өзі қызмет еткен әскери бөлім басшылары бұл жағдайға қатысты қандай да бір пікір білдіруге құлықсыз. Еліміздің Қорғаныс министрлігі де тергеу құпиялылығына байланысты болжам айтудан бас тартып отыр. Ал облыстық полиция департаменті адам өлтіру бабы бойынша қылмыстық іс қозғап, әскери бөлім қызметкерінің өлімін Ішкі істер министрі өз бақылауына алды.