Шымкентте 150 адам жиналған той тоқтатылды

Қызметкерлер мен даяршылар кафе ішінде маска тақпай қызмет көрсеткен 

Шымкентте 150 адам жиналған той тоқтатылды, деп хабарлайды Azattyq Rýhy Polisia.kz-ке сілтеме жасап. 

2021 жылдың 5 маусымында сағат 13:30-да Шымкент қаласында орналасқан “Шымкент холл” мейрамханасы карантиндік шектеулерді бұзып, келушілерді қабылдап жатқаны анықталды. Қызметкерлер мен даяршылар кафе ішінде бір реттік бетпердені тақпай қызмет көрсеткен. 

Сондай-ақ 150 адамға арналған қыз ұзату тойын өткізіп жатқаны белгілі болды.

Аталған жайт бойынша карантин талаптарын сақтамай жұмысын жалғастырған кафе әкімшісінен түсініктеме алынды. Жинақталған іс-құжаттар шара қолдану үшін ҚР ӘҚБтК-нің 425-бабы (Халықтың санитариялық-эпидемиологиялық саламаттылығы саласындағы заңнама талаптарын, сондай-ақ гигиеналық нормативтердi бұзу) бойынша Тауарлар мен көрсетілетін қызметтердің сапасы мен қауіпсіздігін бақылау басқармасына жолданды.

×
Бұл желілік ресурстың ақпараттық өнімдері 18 жастан асқан адамдарға арналған.