Алматыда бір отбасы түгел газдан уланып қалды

Алматы қаласы Алатау ауданындағы жер үйлердің бірінде газ құрылғысынан шыққан табиғи газға 7 адам уланды, деп хабарлайды Azattyq Rýhy тілшісі «АлматыГазСервис» АҚ баспасөз қызметіне сілтеме жасап.

«Олар түнгі уақытта ашық қалған газ плитасының тұтқасына мән бермеген деген болжам бар. Сағат 00:22 шамасында төрт бала мен үш ересек адам ауруханаға жеткізілген. Балалардың үлкені 6 жасар, ең кішісі бір жасқа да толмаған», делінген хабарламада.

Иіс тиген отбасы мүшелері Алматыдағы шұғыл медициналық көмек көрсету орталығында алғашқы дәрігерлік көмек алды.

Боралдай шағын ауданындағы Османов көшесіне «Алматыгазсервис-Холдинг» компаниясы табиғи газ желісін тартқан. Оқиға орнында төтенше жағдай департаменті мамандары мен полиция жұмыс істеп жатыр.

Ришат Асқарбекұлы, Алматы